இந்து ஆலயங்கள் தாக்கப்படுவது கிளிநொச்சி மாவட்டத்துக்கும் விரிவாகி இருக்கிறது. நேற்று அதிகாலை கிளிநொச்சியிலுள்ள மூன்று ஆலயங்கள் உடைக்கப்பட்டு மூல விக்கிரகங்கள் திருடப்பட்டுள்ளன.
இதற்கு முன்னர் மன்னார், வவுனியா மாவட்டங்களில் உள்ள இந்து ஆலயங்கள் தாக்கப்பட்டிருந்தன. கிளிநொச்சி முரசுமோட்டைப் பகுதியில் உள்ள வரலாற்றுச் சிறப்பு மிக்க மூன்று ஆலயங்களே உடைக்கப்பட்டுள்ளன.
ஆலயங்களை உடைத்து மூல விக்கிரகங்கள் சேதப்படுத்தப்பட்டுள்ளதுடன் அவற்றில் சில திருடப்பட்டுமுள்ளன என்று பொலிஸார் தெரிவித்தனர்.
முரசுமோட்டை சிவா சுப்பிரமணியர் ஆலயத்தின் கதவுகள் உடைக்கப்பட்டு மூல விக்கிரகமான வேல் முறிக்கப்பட்டுள்ளது. களஞ்சிய அறையும் உடைக்கப்பட்டு சோதனை இடப்பட்டுள்ளது .
முரசுமோட்டை சேற்றுக்கண்டி முத்துமாரி அம்மன் ஆலயக் கதவுகள் உடைக்கப்பட்டு மூல விக்கிரகமும் கடுமையாகச் சேதப்படுத்தப்பட்டதுடன் சில விக்கிரங்கள் திருடப்பட்டுமுள்ளன. அத்தோடு அம்மனுக்குச் சாத்தப்பட்டிருந்த தங்கப் பொட்டுகள் மற்றும் உண்டியலில் இருந்த பணம் என்பவும் திருடப்பட்டுள்ளன.
இரண்டாம் கட்டைப் பிள்ளையார் ஆலயமும் உடைக்கப்பட்டு அங்கிருந்த ஒலிபெருக்கி சாதங்கள் திருடப்பட்டுள்ளன. காலையில் பூசை வழிபாடுகளை மேற்கொள்ளவதற்கு ஆலயத்துக்குச் சென்றபோதே திருட்டு இடம்பெற்றமை தெரியவந்துள்ளது.சம்பவ இடங்களுக்கு வருகை தந்த பொலிஸார் விசாரணைகளை முன்னெடுத்தனர். ”மூன்று ஆலயங்களிலும் ஒரு குழுவினரே கைவரிசை காட்டியிருக்கலாம் என பொலிஸார் சந்தேகிக்கப்படுகின்றனர்.
வரலாற்றுச்சிறப்பு மிக்க இந்த ஆலயங்களில் திருட்டுப் போன பெறுமதிகளை விட மூல விக்கிரகத்தினை உடைத்தது பெரும் கவலையை ஏற்படுத்தியுள்ளதாக மக்கள் கவலை தெரிவித்தனர். மூல விக்கிரகங்கள் உடைக்கப்பட்டால் கும்பாபிசேகம் செய்தே அவற்றை பிரதிஷ்டை செய்ய முடியும்.
கடந்த சில ஆண்டுகளாகவே மன்னார் மாவட்டத்தில் இந்து ஆலயங்கள் உடைக்கப்பட்டு அங்குள்ள கடவுளர் சிலைகளும் சேதமாக்கப்பட்டு வந்தன. இந்த ஆண்டு சிவராத்திரி தினத்தன்று மீண்டும் அங்கு இரண்டு ஆலயங்கள் உடைக்கப்பட்டு சேதமாக்கப்பட்டிருந்தன. கடந்த மாதம் முல்லைத்தீவிலும் ஆலயம் ஒன்று உடைக்கப்பட்டு கடவுளர் சிலை கடுமையாகச் சேதப்படுத்தப்பட்டிருந்தது.
இவற்றுக்கு எதிராக உடனடி நடவடிக்கை எடுக்க வலியுறுத்தி இந்து அமைப்புக்கள் வடக்கில் கவனவீர்ப்புப் போராட்டங்களை நடத்தியிருந்தனர். இறுதியில் நல்லூரிலும் போராட்டம் இடம்பெற்றது. இந்த நிலையிலேயே நேற்று கிளிநொச்சியில் ஆலயங்கள் உடைக்கப்பட்டு மூல விக்கிரகங்கள் திருடப்பட்டுள்ளன.
