பெண் ஊடகப் பணியாளர் ஒருவர் கிணற்றில் இருந்து சடலமாக மீட்கப்பட்டுள்ளார். பொன்னாலையைச் சேர்ந்தவரும் தற்போது வேலணையில் வசித்து வந்தவருமான திருமதி யோகேந்திரன் பத்மாவதி(வயது 32) என்பவரே அவரது வீட்டுக்கு அருகில் தோட்டக்காணியொன்றில் இருந்த கிணற்றில் சடலமாக மீட்கப்பட்டார்.
பொன்னாலையைச் சேர்ந்த இவர் கடந்த ஐந்து மாதங்களுக்கு முன்னர் வேலணையில் திருமணம் செய்து அங்கு வசித்து வந்தார். இந்நிலையில் நேற்று முன்தினம் இரவு 11. 30 மணியளவில் இவரைக் காணவில்லை என தேடிய போது நேற்று அதிகாலை 1. 00 மணியளவில் அயலில் உள்ள கிணற்றில் இருந்து சடலமாக மீட்கப்பட்டார் என தெரிவிக்கப்பட்டது.
இவரது மரணத்திற்கான காரணம் இதுவரை தெரியவரவில்லை. உதயன் பத்திரிகை நிறுவனத்தில் விளம்பரப்பிரிவில் பல வருடங்களாக பணியாற்றி பின்னர்கடந்த வருடம் அங்கிருந்து விலகி ” காலைக்கதிர்” பத்திரிகை நிறுவனத்தின் விளம்பரப்பிரிவில் சில மாதங்கள் பணியாற்றினார். திருமணத்தின் பின்னர் வேலணையில் வசித்து வந்தமையால் இவர் பத்திரிகை அலுவலகப் பணியினை இடைநிறுத்தியிருந்தார்.
இவரது இறுதி நிகழ்வுகள் இன்று பொன்னாலையில் நடைபெறும் என அறிவிக்கப்பட்டுள்ளது.
