உலகெங்கும் உள்ள பல்கலைக்கழகங்கள் அகதிகளின் கல்விக்கு மேலும் பல உதவிகளை அளிக்க வேண்டும் என்ற கோரிக்கை ஆஸ்திரேலியாவில் நடைபெற்ற சர்வதேச உயர்கல்வி மாநாட்டில் எழுந்துள்ளது.
உலகில் உள்ள 65 மில்லியன் அகதிகளில் வெறும் 1 சதவீத அகதிகளுக்கே உயர்கல்வி கிடைப்பதாக ஐ.நா. தெரிவிக்கின்றது.
இம்மாநாட்டில் பங்குபெற்ற போர்த்துகல் தூதர் ஹெலனா பரோகோ,“அடுத்த தலைமுறை தலைவர்களை உருவாக்க உயர்கல்வி அடிப்படையானது. அவர்களே நாட்டினை மீண்டும் கட்டியெழுப்பக் கூடியவர்கள். இப்படியான அகதிகள் நெருக்கடியில் இளைய சமுதாயத்திற்காக நாம் முதலீடு செய்யவில்லை என்றால் போரால் அழிவுண்ட நாடுகளை யார் மீண்டும் கட்டியெழுப்புவார்கள்” என்ற கேள்வியினை எழுப்பியுள்ளார்.
150 சிரிய மாணவர்களின் உயர்கல்விக்கான போர்த்துகல்லின் உதவித்திட்டத்தை முன்னெடுத்து வரும் இவர், இது போன்ற உதவிகள் பல அகதிகளுக்கு தேவைப்படுவதாகக் கூறியுள்ளார்.
ஆஸ்திரேலியாவின் அகதிகள் கவுன்சிலுடன் பணியாற்றும் மொனாஷ் பல்கலைக்கழகத்தின் முனைவர் பட்ட மாணவர் கரேன் துன்வுட்டே,“தற்காலிக பாதுகாப்பு விசாவில் உள்ளவர்கள் சர்வதேச மாணவர்களின் கட்டணத்தைக் கொடுத்தே இங்கு பயில வேண்டியுள்ளது. அதில் சிலருக்கே அரசு மற்றும் பல்கலைக்கழக உதவிக் கிடைக்கின்றது” எனக் குறிப்பிட்டுள்ளார்.
ஏற்கனவே ஆஸ்திரேலியாவின் வரிப்பணித்திலிருந்து ஓர் ஆண்டுக்கு 1.9 பில்லியன் டாலர்கள் அகதிகளின் நலனிற்காக செலவிடப்படுவதாகவும் அகதிகளுக்கான நல உதவிகளை தாராளமாக செய்யும் நாடுகளில் ஆஸ்திரேலியா முதன்மையாக உள்ளதாகவும் ஆஸ்திரேலிய குடிவரவுத்துறை அமைச்சர் பீட்டர் டட்டனின் பேச்சாளர் கூறியுள்ளார்.
