நகைச்சுவை நடிகராகயிருந்து வெற்றிகரமான கதையின் நாயகனாக உயர்ந்திருக்கும் நடிகர் சந்தானம் நடிப்பில் தயாராகி வரும் பெயரிடப்படாத புதிய படத்தின் பணிகள் இறுதிக்கட்டத்தை எட்டியிருப்பதாக படக்குழுவினர் உற்சாகத்துடன் தெரிவித்துள்ளனர்.
அறிமுக இயக்குநர் ஆனந்த் நாராயண் இயக்கத்தில் தயாராகி இருக்கும் பெயரிடப்படாத புதிய திரைப்படத்தில் நடிகர் சந்தானம் கதையின் நாயகனாக நடித்திருக்கிறார். இவருடன் நடிகை ப்ரியாலயா, தம்பி ராமையா, மறைந்த நடிகர் மனோ பாலா, முனீஸ்காந்த், விவேக் பிரசன்னா, பால சரவணன், மாறன், கூல் சுரேஷ் உள்ளிட்ட பலர் நடித்திருக்கிறார்கள். இப்படத்தின் கதை, திரைக்கதை, வசனத்தை எழிச்சூர் அரவிந்தன் எழுத, ஓம் நாராயணன் ஒளிப்பதிவு செய்ய, டி. இமான் இசையமைத்திருக்கிறார். நகைச்சுவைக்கும், இளைய தலைமுறையினருக்கும் முக்கியத்துவம் கொடுத்து உருவாகி இருக்கும் இந்த திரைப்படத்தை கோபுரம் பிலிம்ஸ் பட நிறுவனம் சார்பில் பிரபல தயாரிப்பாளர் ஜி. என். அன்புச் செழியன் தயாரித்திருக்கிறார்.
இப்படத்தின் படப்பிடிப்பு பணிகள் நிறைவடைந்து இறுதி கட்டப் பணிகள் விறுவிறுப்பாக நடைபெற்று வருகிறது. விரைவில் படத்தின் ஃபர்ஸ்ட் லுக், டைட்டில் மற்றும் வெளியீட்டு திகதி ஆகியவை அறிவிக்கப்படும் என எதிர்பார்க்கப்படுகிறது.
இதனிடையே தமிழ் சினிமாவின் அசைக்க முடியாத சக்தியாக திகழும் அன்புச் செழியன் தயாரித்திருக்கும் இந்த திரைப்படம் சந்தானத்திற்கு வெற்றிப்படமாக அமையும் என திரையுலக வணிகர்கள் அவதானித்திருக்கிறார்கள் என்பது குறிப்பிடத்தக்கது.
