அயர்லாந்துக்கு எதிராக காலி சர்வதேச விளையாட்டரங்கில் நடைபெற்றுவந்த முதலாவது டெஸ்ட் கிரிக்கெட் போட்டியில் ஓர் இன்னிங்ஸ் மற்றும் 280 ஓட்டங்களால் இலங்கை அமோக வெற்றியீட்டியது.
இதன் மூலம் 2 போட்டிகள் கொண்ட டெஸ்ட் தொடரில் இலங்கை 1 – 0 என்ற ஆட்டக் கணக்கில் முன்னிலையில் இருக்கிறது.
இலங்கைக்கும் அயார்லாந்துக்கும் இடையிலான முதலாவது டெஸ்ட் போட்டி மூன்று நாட்களுக்குள் நிறைவுபெற்றது.
திமுத் கருணாரட்ன, குசல் மெண்டிஸ், தினேஷ் சந்திமால், சதீர சமரவிக்ரம ஆகியோர் குவித்த சதங்களும் ப்ரபாத் ஜயசூரியவின் 10 விக்கெட் குவியலும் இலங்கையின் வெற்றியை இலகுவாக்கின.
இந்தப் போட்டி முடிவுடன் அயர்லாந்து தான் இதுவரை விளையாடிய 5 டெஸ்ட் போட்டிகளிலும் தோல்வி அடைந்துள்ளது.
முதல் இன்னிங்ஸ் நிறைவில் 448 பின்னிலையில் இருந்தவாறு பலோ ஒன் முறையில் 2ஆவது இன்னிங்ஸில் துடுப்பெடுத்தாட நிர்ப்பந்திக்கப்பட்ட அயர்லாந்து சகல விக்கெட்களையும் இழந்து 168 ஓட்டங்களைப் பெற்று இன்னிங்ஸால் தோல்வி அடைந்தது.
அப் போட்டியில் முதல் இன்னிங்ஸில் இலங்கை 6 விக்கெட்களை இழந்து 591 ஓட்டங்களைப் பெற்றதுடன் அயர்லாந்து அதன் முதல் இன்னிங்ஸில் 143 ஓட்டங்களை மாத்திரமே பெற்றது.
போட்டியின் 3ஆம் நாளான இன்று செவ்வாய்க்கிழமை (18) காலை தனது முதல் இன்னிங்ஸை 7 விக்கெட் இழப்புக்கு 117 ஓட்டங்கள் என்ற நிலையிலிருந்து தொடர்ந்த அயர்லாந்து கடைசி 3 விக்கெட்களை 26 மேலதிக ஓட்டங்களுக்கு இழந்தது.
2ஆம் நாள் ஆட்ட நேர முடிவில் 21 ஓட்டங்களுடன் ஆட்டம் இழக்காமல் இருந்த லோர்க்கன் டக்கர் 3ஆம் நாள் காலை திறமையாகத் துடுப்பெடுத்தாடி 45 ஓட்டங்களைப் பெற்று ஆட்டம் இழந்தார். மொத்த எண்ணிக்கை 143 ஓட்டங்களாக இருந்தபோது அயர்லாந்தின் கடைசி 3 விக்கெட்களும் வீழ்த்தப்பட்டன.
இலங்கை பந்துவீச்சில் ப்ரபாத் ஜயசூரிய 52 ஓட்டங்களுக்கு 7 விக்கெட்களை வீழ்த்தி டெஸ்ட் அரங்கில் தனது அதிசிறந்த இன்னிங்ஸ் பந்துவீச்சுப் பெறுதியைப் பதிவு செய்தார். விஷ்வா பெர்னாண்டோ 38 ஓட்டங்களுக்கு 2 விக்கெட்களைக் கைப்பற்றினார்.
பலோ ஒன் முறையில் 2ஆவது இன்னிங்ஸில் துடுப்பெடுத்தாடிய அயர்லாந்து தேநீர் இடைவேளைக்கு சற்று பின்னர் கடைசி விக்கெட்டை இழந்தபோது அதன் மொத்த எண்ணிக்கை 168 ஓட்டங்களாக இருந்தது.
ஒரு கட்டத்தில் அயர்லாந்து 5 விக்கெட்களை இழந்து 40 ஓட்டங்களை மாத்திரம் பெற்றிருந்ததால் அவ்வணி 100 ஓட்டங்களை எட்டுமா என்ற சந்தேகம் நிலவியது.
ஆனால், ஹெரி டெக்டர் (42), கேர்ட்டிஸ் கெம்ஃபர் (30), ஜோர்ஜ் டொக்ரல் (32), அண்டி மெக்ப்றைன் (10), மார்க் அடயார் (23 ஆ.இ.) ஆகியோர் இரட்டை இலக்க எண்ணிக்கைகளைப் பெற்று அயர்லாந்து 150 ஓட்டங்களைக் கடக்க உதவினர்.
இலங்கை பந்துவீச்சில் ரமேஷ் மெண்டிஸ் 4 விக்கெட்களையும் ப்ரபாத் ஜயசூரிய 3 விக்கெட்களையும் விஷ்வா பெர்னாண்டோ 2 விக்கெட்களையும் கைப்பற்றினர். இதனிடையே தனது 11ஆவது டெஸ்ட் போட்டியில் விளையாடிய ரொமேஷ் மெண்டிஸ் 50 விக்கெட்களைப் பூர்த்தி செய்தார். இதுவரை அவர் 51 விக்கெட்களைக் கைப்பற்றியுள்ளார்.
அத்துடன் தனது 6ஆவது டெஸ்ட் போட்டியில் விளையாடிய ப்ரபாத் ஜயசூரிய இரண்டாவது தடவையாக 10 விக்கெட் குவியலைப் பதிவு செய்தார்.
ப்ரபாத் ஜயசூரிய இதுவரை 6 டெஸ்ட் போட்டிகளில் மொத்தமாக 43 விக்கெட்களைக் கைப்பற்றியுள்ளார். அடுத்த டெஸ்ட் போட்டியில் மேலும் 7 விக்கெட்களைக் கைப்பற்றினால் அதிவேகமாக 50 விக்கெட்களைப் பூர்த்தி செய்த இலங்கை பந்துவீச்சாளர் என்ற சாதனையை நிலைநாட்டுவார்.
எண்ணிக்கை சுருக்கம்
இலங்கை 1ஆவது இன்: 591 – 6 விக். டிக்ளயார்ட் (திமுத் கருணாரட்ன 179, குசல் மெண்டிஸ் 140, சதீர சமரவிக்ரம 104 ஆ.இ., தினேஷ் சந்திமால் 102 ஆ.இ., கேர்ட்டிஸ் கெம்ஃபர் 84 – 2 விக்.)
அயர்லாந்து 1ஆவது இன்: சகலரும் ஆட்டம் இழந்து 143 (லோக்கன் டக்கர் 45, டேம்ஸ் மெக்கலம் 35, ஹெரி டெக்டர் 34, ப்ரபாத் ஜயசூரிய 52 – 7 விக்., விஷ்வா பெர்னாண்டோ 38 – 2 விக்.)
அயர்லாந்து (ஃபலோ ஒன்) 2ஆவது இன்: சகலரும் ஆட்டம் இழந்து 168 (ஹெரி டெக்டர் 42, ஜோர்ஜ் டொக்ரல் 32, கேர்ட்டிஸ் கெம்ஃபர் 30, மார்க் அடயார் 23 ஆ.இ., ரமேஷ் மெண்டிஸ் 76 – 4 விக்., ப்ரபாத் ஜயசூரிய 56 – 3 விக்., விஷ்வா பெர்னாண்டோ 3 – 2 விக்.)
