‘மாநாடு’ படத்தை தொடர்ந்து இயக்குனர் வெங்கட்பிரபு அடுத்ததாக கன்னடத்தின் முன்னணி நடிகர் கிச்சா சுதீப் கதையின் நாயகனாக நடிக்கும் படத்தை இயக்கவிருப்பதாக அறிவித்திருக்கிறார்.
‘நான் ஈ’ என்ற படத்தின் மூலம் தமிழ் இரசிகர்களிடம் பிரபலமானவர் கன்னட நடிகர் கிச்சா சுதீப்.
விஜய் நடித்த ‘புலி’, எஸ்.எஸ். ராஜமௌலி இயக்கத்தில் வெளியான ‘பாகுபலி’, இயக்குநர் கே.எஸ். ரவிக்குமார் இயக்கத்தில் தயாரான ‘முடிஞ்சா இவனைப் பிடி’ ஆகிய படங்களில் நடித்திருக்கிறார்.
இவர் தற்போது மிக பிரமாண்டமான பட்ஜட்டில் கன்னடம், தமிழ், தெலுங்கு, மலையாளம், ஹிந்தி ஆகிய பல மொழிகளில் தயாராகும் ‘விக்ராந்த் ரோனா’ என்ற படத்தில் கதையின் நாயகனாக நடித்து வருகிறார்.
இந்நிலையில் இவர் அடுத்ததாக ‘சென்னை-28’, ‘மங்காத்தா’, ‘மாநாடு’ ஆகிய படங்களை இயக்கிய இயக்குனர் வெங்கட்பிரபு இயக்கத்தில் தயாராகும் புதிய பெயரிடப்படாத படத்தில் கதையின் நாயகனாக நடிக்க ஒப்பந்தமாகி இருக்கிறார். இதுகுறித்த அதிகாரப்பூர்வமான தகவல்கள் விரைவில் வெளியாகும் என எதிர்பார்க்கப்படுகிறது.
வெங்கட் பிரபுவும், சுதீப்பும் முதன் முறையாக இணையவிருப்பதால் இப்படத்திற்கு தொடக்கத்திலேயே எதிர்பார்ப்பு உருவாகியிருக்கிறது.
