கடந்த 82 ஆண்டுகளில் அதிக வயதில் டெஸ்ட் சதம் அடித்த வீரர் என்ற பெருமையை பாகிஸ்தான் அணித்தலைவர் மிஸ்பா உல் ஹக் அடைந்துள்ளார்.

லார்ட்ஸ் மைதானத்தில் இங்கிலாந்து-பாகிஸ்தான் அணிகளுக்கு இடையிலான முதல் டெஸ்ட் கிரிக்கெட் போட்டி நடைபெற்று வருகிறது.

டாஸ் வென்ற பாகிஸ்தான் அணி முதலில் பேட்டிங் தேர்வு செய்தது. அந்த அணி தேனீர் இடைவேளை வரை 4 விக்கெட் இழப்பிற்கு 158 ரன்கள் எடுத்திருந்தது. மிஸ்பா உல் ஹக் 48 ரன்னுடனும், ஆசாத் ஷபிக் 12 ரன்னுடனும் களத்தில் இருந்தனர்.

தேனீர் இடைவேளைக்குப் பின்னர் தொடர்ந்து விளையாடிய மிஸ்பா உல் ஹக் 154 பந்துகளில் சதம் அடித்தார். இதன்மூலம், கடந்த 82 ஆண்டுகளில் அதிக வயதில் டெஸ்ட் சதம் அடித்த வீரர் என்ற பெருமையை பாகிஸ்தான் அணித்தலைவர் மிஸ்பா உல் ஹக் அடைந்துள்ளார். மிஸ்பா உல் ஹக்கிற்கு இன்றுடன் 42 வயது, 47 நாட்கள் ஆகிறது.

இதுவரை 62 டெஸ்ட் போட்டிகளில் விளையாடியுள்ள மிஸ்பா இச்சதத்துடன் சேர்த்து மொத்தம் 10 சதம் அடித்துள்ளார்.

கடந்த 1934ம் ஆண்டு அவுஸ்திரேலியாவுக்கு எதிரான டெஸ்ட் போட்டியில் இங்கிலாந்து வீரர் Patsy Hendren தனது 45 வயதில் சதம் அடித்தார். அவரை தொடர்ந்து 82 ஆண்டுகளுக்கு பிறகு மிஸ்பா தனது 42 வயதில் டெஸ்ட் சதம் அடித்து பெருமை அடைந்துள்ளார்.