யாழ் பல்கலைக்கழக கிளிநொச்சி அறிவியல்நகர் வளாகத்தில் கல்வி கற்கும் மாணவர்கள் ஒன்றிணைந்து அரசுக்கு எதிராக ஆர்ப்பாட்டம் ஒன்றை இன்று (03) மேற்கொண்டிருந்தார்கள்.
அவசர கால நிலைமை, நாட்டில் தற்போது ஏற்பட்டுள்ள விலைவாசி அதிகரிப்பு, பொருட்கள் தட்டுப்பாடு, எரிவாயு தட்டுப்பாடு, எரிபொருள் தட்டுப்பாடு, போன்றவற்றால் இலங்கையில் மக்கள் பாரிய இன்னல்களை சந்தித்து வருகிறார்கள். இவற்றை அரசாங்கம் கண்டுகொள்ளவில்லை என அரசாங்கத்தை கண்டித்து இந்த ஆர்ப்பாட்டத்தை மேற்கொண்டிருந்தார்கள்.
பொறியியல் பீடம், தொழிநுட்ப பீடம், விவசாய பீட மாணவர்கள் ஒன்றிணைந்து இப் போராட்டத்தை மேற்கொண்ருந்தார்கள்.
எதிர்ப்பு போராட்டத்தில் ஈடுபட்ட மாணவர்கள் 74 ஆண்டுகால பேரழிவுக்கு முடிவு கட்டுவோம், பேராதனை பல்கலைகழகத்தை சுற்றிவளைத்துள்ள பொலிஸ், படைகளை அகற்று, அடுத்த தலைமுறைக்காக நாட்டை பாதுகாப்போம், கோட்டா வீட்டுக்கு செல்லுங்கள், மனித உரிமைகள் மீறல்களை நிறுத்து போன்ற வாசகங்கள் எழுதப்பட்ட பதாதைகளையும் ஏந்தியிருந்தனர்.
