பழம்பெரும் நடிகை குசலகுமாரி. 82 வயதான இவர் சென்னை நந்தனம் பகுதியில் உள்ள அடுக்குமாடி குடியிருப்பில் தனது சகோதரர் கமலசேகர் வீட்டில் வசித்து வந்தார். முதுமை காரணமாக பல்வேறு நோய்கள் தாக்கப்பட்ட நிலையில் சிகிச்சை பெற்று வந்தார். இந்த நிலையில் நேற்று முன்தினம் இரவு அவருக்கு தூக்கத்திலேயே உயிர் பிரிந்தது.
பின்னர் அவரது உடல் பொதுமக்கள் பார்வைக்காக வைக்கப்பட்டது. நேற்று ஏராளமான சினிமா பிரபலங்கள் வந்து அஞ்சலி செலுத்தினார்கள். தென்னிந்திய நடிகர் சங்கம் இரங்கல் செய்தி வெளியிட்டது. பின்னர் அவர் உடல் ஊர்வலமாக எடுத்துச் செல்லப்பட்டு கண்ணம்மாபேட்டை சுடுகாட்டில் தகனம் செய்யப்பட்டது.
வாழ்க்கை வரலாறு:
மக்கள் திலகம் எம்.ஜி.ஆரும், நடிகர் திலகம் சிவாஜியும் இணைந்து நடித்த ஒரே படமான கூண்டுக்கிளியில் ஹீரோயினாக நடித்தவர் குசலகுமாரி. கூண்டுக்கிளிக்குப் பின்னர் நாகேஸ்வரராவ், பிரேம் நசீருடன் இணைந்து நடித்து இருந்தார் குசலகுமாரி. பராசக்தி, கொஞ்சும் சலங்கை, ஹரி சந்திரா, மதுரை வீரன் , கள்வனின் காதலி, ஹரிச்சந்திரா மற்றும் அவ்வையார் உள்பட பல படங்களில் நடித்துள்ளார்.
மன்மத லீலை படத்தில் கமல்ஹாசனின் மாமியார் வேடத்தில் நடித்து இருந்தார். குசலகுமாரி பரத நாட்டியம் கற்றவர். 250 படங்களுக்கு மேல் நடனமும் ஆடியுள்ளார். கொஞ்சும் சலங்கை படத்தில் இவர் ஆடிய போட்டி நடனம் பிரபலம். சாவித்திரிக்கு முன்பே மிகவும் வேகமாக கார் ஓட்டும் நடிகை என்று திரையுலகினரால் பேசப்பட்டவர். குசல குமாரிக்கு திருமணம் ஆகவில்லை.
இவர் வறுமையில் வாடுவதாக மறைந்த முதல்வர் ஜெயலலிதாவுக்கு செய்தி சென்றது. இதையடுத்து, கடந்த 2015ஆம் ஆண்டு வறுமையில் வாடிய நடிகை குசலகுமாரிக்கு தமிழக அரசின் சார்பில் மாதம் ரூ. 5,000 நிதியுதவி அளித்து ஜெயலலிதா உத்தரவு பிறப்பித்தார்.
