கிஷோர் தற்போது நடித்து வரும் படம் பசுமை வழி சாலை. இது சென்னையிலிருந்து சேலம் வரை போடப்படுவதாக இருக்கும் பசுமை வழிச்சாலையை பின்புலமாக கொண்ட படம். இதில் கிஷோருடன், பசுபதி முக்கிய கேரக்டரில் நடிக்கிறார். ஜஸ்டின் பிரபாகரன் இசை அமைக்கிறார், சத்வா புரொடக்ஷன் சார்பில் நிருபமாக தயாரிக்கிறார். சந்தோஷ் இயக்குகிறார்.
சென்னை சேலம் பசுமை வழி சாலைக்காக இந்தியாவில் உள்ள முக்கிய பசுமை வழி சாலைகளில் பயணித்து அதன் அனுபவங்களை சேகரிக்கிற ஒரு சமூக ஆர்வலர் கேரக்டரில் கிஷோர் நடிக்கிறார். இதற்காக அவர் நிஜமாகவே பெங்களூரில் இருந்து பைக்கில் புறப்பட்டு ஜம்மு காஷ்மீர், லடாக், திபெத், நேபாள், வழியாக பூடான் வரை சென்று கொண்டிருக்கிறார். படப்பிடிப்பு குழுவினர் கார், வேனில் அவரை பின் தொடர்ந்து படம்பிடித்து வருகிறார்கள். இந்தப் படம் தமிழ் சினிமாவின் வித்தியாசமான அனுபவத்தை கொடுக்கும் படமாக இருக்கும் என்கிறார்கள்.
