நகைச்சுவை நடிகராக நடித்துக் கொண்டே கதையின் நாயகனாகவும் நடித்து வரும் நடிகர் சதீஷ் நடிப்பில் தயாராகி இருக்கும் ‘வித்தைக்காரன்’ எனும் திரைப்படத்தின் டீசர் வெளியிடப்பட்டிருக்கிறது.
இதனை இசையமைப்பாளரும், நடிகருமான ‘இசை அசுரன்’ ஜி. வி. பிரகாஷ் குமார் அவருடைய சமூக வலைதள பக்கத்தில் வெளியிட்டு சிறப்பித்திருக்கிறார்.
இயக்குநர் வெங்கி இயக்கத்தில் தயாராகி இருக்கும் திரைப்படம் ‘வித்தைக்காரன்’. இதில் சதீஷ், சிம்ரன் குப்தா, ஆனந்த்ராஜ், மதுசூதன், சுப்ரமணிய சிவா, ஜான் விஜய், பவல் நவகீதன், ஜப்பான் குமார் உள்ளிட்ட பலர் நடித்திருக்கிறார்கள்.
யுவ கார்த்திக் ஒளிப்பதிவு செய்திருக்கும் இந்த திரைப்படத்திற்கு வி பி ஆர் இசையமைத்திருக்கிறார். மாய ஜால மந்திர வித்தை செய்யும் ஒருவரின் வாழ்வியலை மையப்படுத்தி தயாராகி இருக்கும் இந்த திரைப்படத்தை ஒயிட் கார்பெட் பிலிம்ஸ் என்னும் பட நிறுவனம் சார்பில் தயாரிப்பாளர் கே. விஜய் பாண்டி தயாரித்திருக்கிறார்.
இப்படத்தின் படப்பிடிப்பு பணிகள் நிறைவடைந்து இறுதி கட்டப் பணிகள் விறுவிறுப்பாக நடைபெற்று வருகிறது. இந்நிலையில் இப்படத்தின் டீசர் வெளியிடப்பட்டிருக்கிறது.
டீசரில் நாயகன் சதீஷ், பல கோடி ரூபாய் மதிப்புள்ள தங்க, வைர நகைகளை தன்னுடைய மாயாஜால வித்தையால் கடத்தி வருவது போன்று காட்சிகள் அமைக்கப்பட்டிருப்பதால் பார்வையாளர்களிடையே பெரும் எதிர்பார்ப்பை ஏற்படுத்தி இருக்கிறது.
