சிவகார்த்திகேயனின் மிஸ்டர் லோக்கல் படத்தின் ஃபர்ஸ்ட் லுக் போஸ்டர் வெளியாகியுள்ளது.
சீமராஜா, கனா ஆகிய படங்களுக்கு பிறகு சிவகார்த்திகேயன் தற்போது ராஜேஷ் இயக்கத்தில் நடித்து வருகிறார். இந்தப் படத்திற்கு ‘மிஸ்டர் லோக்கல்’ என்று தலைப்பிடப்பட்டுள்ளது. இந்த ஆண்டு வரவிருக்கும் முக்கிய படங்களில் இதுவும் ஒன்றாக கருதப்படுகிறது. இந்தப் படம் பற்றிய புதிய அப்டேட்டுகள் வெளியாகியுள்ளன. பிரபல ‘எரும சாணி’ யூ டியூப் சேனலின் நிகழ்ச்சிகளில் நடித்து வந்த ஹரிஜா இப்படத்தில் சிவகார்த்திகேயனின் சகோதரியாக நடிக்கிறார். இவர் இதற்கு முன்பாக அதர்வா நடித்த ‘100’ மற்றும் ‘ஓடவும் முடியாது ஒளியவும் முடியாது’ ஆகிய படங்களிலும் நடித்துள்ளார்.
ஸ்டூடியோ கிரீன் பேனரில் ஞானவேல் ராஜா தயாரிக்கும் இப்படத்திற்கு ஹிப் ஹாப் ஆதி இசையமைக்கிறார். கதாநாயகியாக நயன்தாரா நடிக்கிறார். இதற்கு முன்பு சிவகார்த்திகேயனும், நயன்தாராவும் வேலைக்காரன் படத்தில் ஒன்றாக நடித்தனர். மேலும், இப்படத்தில் ராதிகா சரத்குமார், யோகி பாபு, சதீஸ் ஆகியோரும் முக்கிய கதாப்பாத்திரங்களில் நடிக்கின்றனர். தற்போது இப்படத்தின் ஃபர்ஸ்ட் லுக் போஸ்டரை சிவகார்த்திகேயன் தனது ட்விட்டர் பக்கத்தில் வெளியிட்டுள்ளார். மேலும், வரும் கோடை விடுமுறையின்போது இப்படம் வெளியிடப்படும் என தெரிவிக்கப்பட்டுள்ளது.
