தேர்தலில் வாக்களிக்கும்போது கட்சிகளைப் பார்க்காதீர்கள் ஆள்களைப் பார்த்து வாக்களியுங்கள் என்று கூறிவரும் முதலமைச்சர் மாகாண கல்வி அமைச்சர் சர்வேஸ்வரனைத் தெரிவு செய்த விடயத்தில் மிகப் பெரிய தவறிழைத்துவிட்டார். இவ்வாறு குற்றஞ்சாட்டினார் உறுப்பினர் தியாகராசா.
வடக்கு மாகாண சபையின் 115 ஆவது அமர்வு கைதடியிலுள்ள பேரவைச் செயலகத்தில் வடக்கு மாகாண அவைத்தலைவர் சி.வி.கே.சிவஞானம் தலைமையில் இடம்பெற்றது. அதிலேயே தியாகராசா இவ்வாறு தெரிவித்தார். அவர் தெரிவித்தாவது:-
கடந்த வருடத்தில் எனது பன்முகப்படுத்தப்பட்ட நிதி ஒதுக்கீட்டில் இருந்து கல்வி அமைச்சுக்கு ஊடாக ஒரு வேலைத்திட்டம் ஒன்றை முன்மொழிந்து அதை உரிய காலத்திலேயே கொடுத்திருந்தேன். ஆனால் கல்வி அமைச்சர் என்னுடைய திட்டத்தை வேண்டுமென்றே நிறுத்தி வைத்துள்ளார். வடக்கு மாகாண கல்வி அமைச்சின் செயலாளர் எனக்குப் பல முறை கடிதங்களை அனுப்பியுள்ளார்.
எனது வேலைத்திட்டத்தை உடனடியாக முடிவுறுத்துமாறு செயலாளர் அறிவுறுத்தியும் எதுவும் இடம்பெறவில்லை. 9 இலட்சத்து 75 ஆயிரம் ரூபா பணம் இடைவழியில் நிற்கின்றது. வடக்கு மாகாண கல்வி அமைச்சரின் இந்த செயற்பாட்டால் வவுனியா மாவட்டத்தில் எனது மானமே போகின்றது. இதை முதலமைச்சர் கவனத்தில் எடுக்க வேண்டும்.
