போயஸ் கார்டன் சோதனையை தொடர்ந்து பெங்களூரு சிறையில் உள்ள சசிகலாவிடம் விசாரணை நடத்த வருமானவரித்துறையினர் முடிவு செய்துள்ளனர்.
வாரண்ட் பெற்றே…
சென்னை போயஸ் கார்டனில் மறைந்த முதல்வர் ஜெயலலிதா வசித்த வேதா இல்லத்தில், நேற்று(நவ.,17) இரவு முதல் வருமான வரித்துறையினர் சோதனை நடத்தி வருகின்றனர். வேதா இல்லத்தில் ஜெயலலிதா பயன்படுத்திய 2 பெரிய அறைகள் தவிர மீதமுள்ள 3 அறைகளில் சோதனை நடத்தி வருகின்றனர். நீதிமன்ற விசாரணை இருப்பதால் வாரண்ட் பெற்றே சோதனை நடைபெற்று வருவதாக அதிகாரிகள் தரப்பில் தெரிவிக்கப்பட்டுள்ளது.
சசிகலாவிடமும்…
இந்நிலையில் போயஸ் கார்டன் சோதையை தொடர்ந்து பெங்களூரு சிறையில் இருக்கும் சசிகலாவிடமும் விசாரணை நடத்த வருமானவரித்துறை அதிகாரிகள் முடிவு செய்துள்ளனர். அடுத்தடுத்து அதிரடி தொடர்வதால் சசிகலா தரப்பு பீதியில் உறைந்துள்ளது. முன்னதாக வேதா இல்லம் முன் ஆர்ப்பாட்டத்தில் ஈடுபட்ட தினகரன் ஆதரவாளர்கள் 40 பேரை போலீசார் கைது செய்தனர்.
