தெறியைத் தொடர்ந்து அட்லி இயக்கத்தில் விஜய் நடித்துள்ள படம் மெர்சல். முதன்முறையாக விஜய் மூன்று வேடங்களில் நடித்துள்ள இந்த படத்தின் ஆளப்போறான் தமிழன் என்ற சிங்கிள் டிராக் பாடல் சமீபத்தில் வெளியாகி விஜய் ரசிகர்கள் மத்தியில் ஏகோபித்த ஆதரவை பெற்றிருக்கிறது. எப்போதுமே விஜய், அஜித் ரசிகர்கள், தங்கள் நடிகர்களின் சம்பந்தப்பட்ட போஸ்டர், டீசர், பாடல் என எது வெளியானாலும் அதை இணையதளங்களில் போட்டி போட்டு டிரன்டிங் செய்து வடுகிறார்கள்.
அந்தவகையில், விஜய்யின் மெர்சல் படத்தின் ஆளப்போறான் தமிழன் என்ற பாடல் வெளியானதில் இருந்து விஜய் ரசிகர்கள் இணையதளங்களில் மிகப்பெரிய அளவில் வைரலாக்கி விட்டனர். அதன்காரணமாக, கடந்த வாரம் கூகுள் தேடலில் விஜய்யின் மெர்சல் சிங்கிள் டிராக் பாடல் தான் முதலிடம் பிடித்திருக்கிறது. இப்படியொரு வரவேற்பு கிடைத்ததை தொடர்ந்து விரைவில் மெர்சல் படத்தின் இன்னொரு பாடலையும் வெளியிடப் போகிறார்களாம். ஆக, மெர்சல் திரைக்கு வருவது வரை இணையதளங்களில் விஜய் ரசிகர்களின் ஆளுமை அதிகமாக இருக்கும் என்று தெரிகிறது.
