குஜராத்தில், 89 தொகுதிகளுக்கு, இன்று(டிச.,9) முதற்கட்ட சட்டசபை தேர்தல் நடக்க உள்ளது.
குஜராத் சட்டசபைக்கு, இரண்டு கட்டங்களாக தேர்தல் நடக்க உள்ளது. சவுராஷ்டிரா மற்றும் தெற்கு குஜராத்தில், இன்று நடக்க உள்ள தேர்தலில், 89 தொகுதிகளில், 977 வேட்பாளர்கள் களத்தில் உள்ளனர். இரண்டாம் கட்டமாக, 14ம் தேதி, 93 தொகுதிகளுக்கு தேர்தல் நடக்க உள்ளது. 18ல், ஹிமாச்சல பிரதேசம் மற்றும் குஜராத் தேர்தல் முடிவுகள் அறிவிக்கப்பட உள்ளன.
இன்று நடக்கும் தேர்தலில், பா.ஜ., முதல்வர் விஜய் ரூபானி உள்ளிட்டோர் போட்டியிடுகின்றனர். தொடர்ந்து, ஐந்தாவது முறையாக ஆட்சி அமைக்கும் முனைப்பில், பா.ஜ., உள்ளது. கட்சி தலைவராக, ராகுல் பொறுப்பேற்க உள்ள நிலையில், குஜராத்தில் ஆட்சி அமைக்கும் முயற்சியில் காங்கிரஸ் உள்ளது.
முதற்கட்ட தேர்தல் நடக்கும் பகுதிகளில், பிரதமர் நரேந்திர மோடி, 15 பொதுக்கூட்டங்களில் பங்கேற்று, பா.ஜ., வேட்பாளர்களுக்கு ஆதரவு திரட்டினார். காங்கிரஸ் துணைத் தலைவர், ராகுல், ஏழு நாட்களில், ஏழு கூட்டங்களில் பங்கேற்றார்.
