ராமநாதபுரம் மாவட்டம் கமுதி அருகே, ஆண்கள் மட்டும் இரவு முழுவதும் அம்மனை வழிபட்ட வினோத திருவிழா நடந்தது.
ராமநாதபுரம் மாவட்டம், கமுதி அருகே உள்ள முதல்நாடு கிராமத்தில் எல்லைப்பிடாரி அம்மன் பீடம் அமைக்கப்பட்டுள்ளது. இங்கு ஆண்டுதோறும் புரட்டாசி மாதம் ஆண்கள் மட்டும் கிடாவெட்டி வழிபாடு நடத்தும் திருவிழா மிகவும் பிரசித்தி பெற்றது.
திருவிழா நடக்கும் தேதி அறிவித்தபின் ஒரு வாரத்துக்கு அந்த வழியாக பெண்கள் யாரும் செல்ல மாட்டார்கள். மழை பெய்ய வேண்டியும், நோய் இல்லாமல் மக்கள் மகிழ்ச்சியாக வாழ வேண்டியும், விவசாயம் செழிக்கவும் இந்த திருவிழா கொண்டாடப்பட்டு வருகிறது.
அந்தவகையில் இந்தாண்டுக்கான திருவிழா தேதி கடந்த ஒரு வாரத்திற்கு முன்பு குறிக்கப்பட்ட நிலையில், நேற்றிரவு அம்மன் வழிபாடு நடைபெற்றது.ஆண்கள் ஒன்று கூடி பீடம் அமைத்து கைக்குத்தல் பச்சரிசி சாதம் செய்து, 50 கிடாய்களைப் பலியிட்டனர். பின்னர் சாதம் உருண்டைகளாக உருட்டப்பட்டு பீடத்திற்கு மாலை அணிவித்து பூஜை செய்யப்பட்டது. பனை ஓலையால் செய்த மட்டையில் சாப்பாடு பரிமாறப்பட்டு அனைவரும் சாப்பிட்டனர்.
இதில் கமுதி, முதல்நாடு, முஷ்டக்குறிச்சி, அரிசிக் உழுதான், கே.நெடுங்குளம், பெருமாள்குடும்பன்பட்டி, ஆசூர், திருசெல்லையாபுரம், தலைவநாயக்கன்பட்டி, விருதுநகர் மாவட்ட எல்லையில் உள்ள கிராமங்கள் என 50க்கும் மேற்பட்ட கிராமங்களில் இருந்துமூவாயிரத்துக்கும் மேற்பட்ட ஆண்கள் கலந்து கொண்டனர்.
