களுத்துறை – மத்துகம பொலிஸ் பிரிவில் பாலிகாவீதி , மத்துகம பிரதேசத்தில் பெண்ணொருவர் சுட்டுக் கொல்லப்பட்டுள்ளார்.
38 வயதுடைய மத்துகம பிரதேசத்தைச் சேர்ந்த பெண்ணொருவரே இவ்வாறு சுட்டுக் கொல்லப்பட்டுள்ளதாகவும் , கொலைக்கான காரணம் தெரியவரவில்லை என்றும் பொலிஸ் ஊடகப்பிரிவு தெரிவித்துள்ளது.
எனினும் துப்பாக்கிச் சூட்டினை நடத்துவதற்கு மூன்று நபர்கள் வருகை தந்துள்ளமை தெரியவந்துள்ளது.
களுத்துறை குற்ற ஸ்தள பரிசோதனைப் பிரிவினரால் முன்னெடுக்கப்பட்ட ஸ்தள சோதனைகளில் சம்பவம் இடம்பெற்ற இடத்திலிருந்து ரி – 56 ரக 6 துப்பாக்கி ரவைகள் கைப்பற்றப்பட்டுள்ளன.
மத்துகம நீதவானினால் ஆரம்ப நீதவான் பரிசோதனைகள் முன்னெடுக்கப்பட்டதன் பின்னர் , பிரேத பரிசோதனைக்காக உயிரிழந்த பெண்ணின் சடலம் களுத்துறை – நாகொட வைத்தியசாலையில் வைக்கப்பட்டுள்ளது.
உயிரிழந்த பெண்ணின் கணவனைக் கொல்வதற்காகவே சந்தேகநபர்கள் வருகை தந்துள்ளதாக ஆரம்பகட்ட விசாரணைகளிலிருந்து தெரியவந்துள்ளது.
துப்பாக்கிச்சூடு மேற்கொள்ளப்பட்ட போது கணவன் வீட்டில் இருந்த நிலையிலும் , குறித்த நபர் அதிலிருந்து தப்பியுள்ளார்.
கொலைக்கான காரணம் , கொலை செய்ய சந்தேகநபர்கள் மற்றும் அவர்களால் உபயோகிக்கப்பட்ட துப்பாக்கி என்பவை தொடர்பான மேலதிக விசாரணைகளை மத்துகம பொலிஸார் முன்னெடுத்து வருவதாக பொலிஸ் ஊடகப்பிரிவு மேலும் தெரிவித்துள்ளது.
#No 1 TamilWebSite 
| http://Facebook page / easy 24 news | Easy24News – YouTube | [email protected]
