தமிழக முதல்-அமைச்சர் எடப்பாடி பழனிசாமி மீது நம்பிக்கை இல்லை என்று டி.டி.வி.தினகரன் ஆதரவு எம்.எல்.ஏ.க்கள் தங்கதமிழ்ச்செல்வன் உள்பட 18 பேர் தமிழக கவர்னரிடம் மனு கொடுத்தனர். இதையடுத்து, அந்த 18 எம்.எல்.ஏ.க்களை தகுதி நீக்கம் செய்து தமிழக சட்டசபை சபாநாயகர் தனபால் உத்தரவிட்டார்.
இந்த உத்தரவை எதிர்த்து 18 எம்.எல்.ஏ.க்களும் சென்னை ஐகோர்ட்டில் வழக்கு தொடர்ந்தனர். இந்த வழக்குகளை தலைமை நீதிபதி இந்திரா பானர்ஜி, நீதிபதி எம்.சுந்தர் ஆகியோர் விசாரித்து வந்தனர்.
இந்தநிலையில், இந்த வழக்கு நீதிபதிகள் முன்பு நேற்று மீண்டும் விசாரணைக்கு வந்தது. அப்போது, இந்த வழக்கின் எழுத்துப்பூர்வமான வாதங்களை கொண்ட மனுக்களை எம்.எல்.ஏ.க்கள் சார்பில் ஆஜரான மூத்த வக்கீல்கள் பி.எஸ்.ராமன், ராஜா செந்தூர்பாண்டியன் ஆகியோர் தாக்கல் செய்தனர்.
அரசு தரப்பில் ஆஜரான கூடுதல் அட்வகேட் எஸ்.ஆர்.ராஜகோபால், இந்த வழக்கில் கூடுதலாக ஏதாவது வாதங்களை முன்வைக்க அரசு விரும்பினால், எழுத்துப்பூர்வமான வாதங்களை கொண்ட மனுக்களை வருகிற 29-ந் தேதி தாக்கல் செய்ய அனுமதிக்க வேண்டும் என்றும் கூறினார். இதை ஏற்றுக்கொண்ட நீதிபதிகள், இந்த வழக்கின் தீர்ப்பை தேதி குறிப்பிடாமல் தள்ளிவைத்து உத்தரவிட்டனர்.
