நியூயார்க் தீ விபத்தில் 12 பேர் உயிரிழப்பு

அமெரிக்காவின், நியூயார்க் நகரில் உள்ள அடுக்கு மாடி குடியிருப்பில் ஏற்பட்ட தீ விபத்தில், 1 வயது குழந்தை உட்பட, 12 பேர் உயிரிழந்தனர்; நான்கு பேர் காயமடைந்தனர். கடந்த, 27 ஆண்டுகளில் நடந்த மிகப் பெரிய தீ விபத்து இது.
அமெரிக்காவின், நியூயார்க் நகரின் பிராங்ஸ் பகுதி யில் உள்ள, 100 ஆண்டுகள் பழமையான அடுக்கு மாடி குடியிருப்பில், நேற்று முன்தினம் இரவு தீ விபத்து ஏற்பட்டது.
ஐந்து மாடிகள் உடைய இந்த கட்டடத்தில், தீ மிகவும் வேகமாக பரவியது. 160க்கும் மேற்பட்ட தீயணைப்பு வீரர்கள் கடுமையாக போராடி தீயைக் கட்டுப்படுத்தினர்.
இந்த விபத்தில், 1 வயது குழந்தை உட்பட, 12 பேர் உயிரிழந்தனர்; நான்கு பேர் காயமடைந்தனர். தீ விபத்தில் இருந்து, 12 பேர் உயிருடன் மீட்கப்பட்டுள்ளனர்.
நியூயார்க் நகரில், 1990ல், ஒரு கிளப்பில் ஏற்பட்ட தீ விபத்தில், 87 பேர் உயிரிழந்தனர். அதன்பின், தற்போது நடந்துள்ள மிகப் பெரிய தீ விபத்து இதுவாகும்.