வருகிறார்கள் வாரிசுகள்..

உள்ளூர் கிரிக்கெட்டில் சச்சின் மகன் அர்ஜுன், டிராவிட் மகன் சமித் அசத்தி வருகின்றனர்.

அர்ஜுன் சச்சின்:

சர்வதேச போட்டிகளில் ‘சதத்தில்’ சதம் அடித்தவர் மாஸ்டர் பேட்ஸ்மேன் சச்சின். இவரது மகன் அர்ஜுன், 18. இடதுகை வேகப்பந்துவீச்சு ‘ஆல்– ரவுண்டராக’ உருவெடுத்துள்ளார். சமீபத்திய கூச் பெஹர் டிராபி தொடரில் பவுலிங்கில் மிரட்டினார். தற்போது, சிட்னி கிரிக்கெட் நிர்வாகம் சார்பில் நடக்கும் தொடரில் இந்திய கிரிக்கெட் கிளப் சார்பில் களமிறங்கினார் அர்ஜுன். பவுலிங்கில் 4 விக்கெட், பேட்டிங்கில் 48 ரன் (27 பந்து) எடுத்து, பென் ஸ்டோக்ஸ் (இங்கிலாந்து), மிட்சல் ஸ்டார்க் (ஆஸி.,) போல உருவெடுத்து வருகிறார்.

சமித் டிராவிட்

இந்திய பேட்டிங்கின் சுவர் என போற்றப்பட்டவர் டிராவிட். இவரது மகன் சமித், 14. கர்நாடகாவில் நடக்கும் பள்ளி அளவிலான தொடரில் (14 வயது) பங்கேற்றார். பேட்டிங்கில் ஜொலித்த சமித், 150 ரன்கள் குவித்தார். இவருடன் இணைந்த முன்னாள் ‘சுழல்’ வீரர் சுனில் ஜோஷியின் மகன் ஆர்யன், 154 ரன் எடுக்க, மல்லையா ஆதித்தி பள்ளி, 50 ஓவரில் 500/5 ரன்கள் குவித்தது.

இதில், விவேகானந்தா (88/10) பள்ளியை 412 ரன்கள் வித்தியாசத்தில் வென்றது. இரு ஆண்டுக்கு முன் பள்ளி கிரிக்கெட்டில் சமித், 124 ரன்கள் எடுத்து இருந்தார்.

லாலா, மொகிந்தர்

இதற்கு முன்பும் இந்திய கிரிக்கெட்டில் வாரிசுகள் வலம் வந்தது உண்டு. சுதந்திர இந்தியாவின் டெஸ்ட் அணிக்கு முதல் கேப்டனாக இருந்தவர் லாலா அமர்நாத். இவரது மகன் மொகிர்ந்தர் அமர்நாத் முதல் உலக கோப்பை (1983) வென்ற இந்திய அணியில் இடம் பிடித்தவர். இவர் 69 டெஸ்டில், 4,378 ரன்கள் எடுத்தார்.

விஜய், சஞ்சய்

கடந்த 1952ல் வேகப்பந்து வீச்சாளராக அறிமுகம் ஆனவர் விஜய் மஞ்ச்ரேகர். 55 டெஸ்டில், 3,208 ரன் எடுத்தார். இவரது மகன் சஞ்சய் மஞ்ச்ரேகர். பேட்ஸ்மேனான இவர், 37 டெஸ்ட் (2,043 ரன்), 74 ஒருநாள் (1,994) போட்டிகளில் பங்கேற்றார்.