நடந்து முடிந்த சட்டமன்ற தேர்தலில் பணம் பட்டுவாடா நடப்பதை தடுப்பதற்காக தேர்தல் ஆணையத்தின் ஆலோசணைப்படி பறக்கும் படையினர் தீவிர கண்காணிப்பு பணியில் ஈடுபட்டிருந்த போது, திருப்பூர் அருகே ரூ.570 கோடியுடன் 3 லொறிகள் பிடிபட்டு சி.பி.ஐ விசாரணை நடைபெற்று வருகிறது.

இந்நிலையில், கரூர் அருகே அரவக்குறிச்சி நெடுஞ்சாலையில் தகரக்கொட்டாய் என்ற பகுதியில் இரண்டு லொறிகள் ரூ.1600 கோடி பணத்துடன் நின்று கொண்டிருந்தது.

இதையறிந்த மாவட்ட எஸ்.பி வந்திதா பாண்டே மற்றும் டி.எஸ்.பி கீதாஞ்சலி ஆகியோர் லொறிகள் நிறுத்தி வைக்கப்பட்ட இடத்திற்கு நேரில் சென்று ஆய்வு மேற்கொண்டதில் லொறியில் 500, 1000 ரூபாய் நோட்டுக்கட்டுகள் இருப்பதாகவும், பணத்திற்கான ஆவணங்கள் உள்ளதாகவும் கூறியுள்ளனர்.

கர்நாடகா மாநிலத்தில் மைசூரில் உள்ள ரிசர்வ் வங்கியில் இருந்து திருவனந்தபுரம் ரிசர்வ் வங்கிக்கு பல கோடி ரூபாய் நோட்டுகள் புதிதாக அச்சடிக்கப்பட்டு 2 லொறிகள் மூலம் அனுப்பி வைக்கப்பட்டுள்ளதாக கூறப்படுகிறது.

இந்த லொறிகள் அரவக்குறிச்சி நெடுஞ்சாலையில் தகரக்கொட்டாய் என்ற பகுதியில் வந்து கொண்டிருந்த பொழுது ஒரு லொறி திடீரென்று இயந்திர கோளாறு காரணமாக நின்றது. இதனால் மற்றொரு லொறியும் அங்கேயே நிறுத்தி வைக்கப்பட்டது.

இந்த தகவல் அப்பகுதியில் காட்டு தீ போல் பரவியதால் ரூ.1600 கோடியுடன் நிற்கும் லொறியை காண மக்கள் கூட்டம் கூட்டமாக செல்வதால் பொலிஸ் பாதுகாப்பு அதிகரிக்கப்பட்டுள்ளது.