காணாமல் ஆக்கப்பட்டவர்களை விடுவிக்கவும், வெளிப்படுத்தவும் வலியுறுத்தி வவுனியாவில் நடத்தப்படும் தொடர் போராட்டம் எதிர்வரும் 24ஆம் திகதி சனிக்கிழமை ஓராண்டை எட்டுகின்றது.
அன்றைய தினம் சிவப்பு, மஞ்சள் கொடிகளைப் பறக்க விட்டு அனைவரும் ஆதரவு வழங்க வேண்டும் என்று காணாமல் ஆக்கப்பட்டவர்களின் உறவினர்கள் வேண்டுகோள் விடுத்தனர்.
நேற்று வவுனியாவில் அவர்கள் தொடர்போராட்டம் நடத்தும் போராட்டகளத்தில் நடத்தப்பட்ட செய்தியாளர் சந்திப்பிலேயே இவ்வாறு தெரிவித்தனர். அவர்கள் தெரிவித்ததாவது:-
எமது போராட்டம் இன்று (நேற்று) 362ஆவது நாளை அடைந்துள்ளது. எதிர்வரும் சனிக்கிழமை ஓராண்டை எட்டுகின்றது. அன்று வடக்கு, கிழக்கிலுள்ள அனைத்து சங்கங்களும், பேருந்துச் சங்கம், வர்த்தகர் சங்கம், இ.போ.ச பேருந்து, ஆசிரியர்கள் சங்கங்கள், பல்கலைக்கழகங்கள், பாடசாலைகள், சிறுவியாபாரிகள் சங்கம், பத்திரிகையாளர்கள் என அனைவரும் எமது போராட்டத்துக்கு முழுமையான ஆதரவு வழங்க வேண்டும். உங்களது பணிகளை வழமையாக மேற்கொள்வதுடன் சிவப்பு, மஞ்சள் கொடிகளை கட்டி உங்களுடைய ஒத்துழைப்பு எங்களுக்கு முழுமையான ஆதரவாக சர்வதேசத்துக்கு எடுத்துக் காட்டவேண்டும்.அரசு மீது நம்பிக்கை இழந்துள்ள நிலையிலேயே பன்னாடுகளின் தலையீட்டைக் கோருகின்றோம். எமக்குத் தீர்வு கிடைக்கும் வரை எமது போராட்டத்தைக் கைவிட மாட்டோம் –- என்றனர்.
