அவுஸ்திரேலியா ஹோபார்ட் நகரத்தில் கேரளாவைச் சேர்ந்த லீ மேக்ஸ் ஜாய் என்பவர் மீது அடையாளம் தெரியாத நபர்கள் சிலர் இனவெறித் தாக்குதல் நடத்தியுள்ள சம்பவம் பரபரப்பை ஏற்படுத்தியுள்ளது.

ஹோபார்ட் நகரில் இருக்கும் மெக்டோனல்ட்ஸ் உணவகத்தில் காபி வாங்கச் சென்றுள்ளார் ஜாய். அப்போது அவரை நோக்கி, வந்த ஐந்து ஆஸ்திரேலியர்கள் நிற அடிப்படையில் ஜாயை திட்டி தாக்கியுள்ளனர்.

இதையடுத்து, பக்கத்தில் இருந்தவர்கள் காவல்துறையினருக்கு தகவல் தெரிவிக்கவே, அங்கிருந்து தாக்குதல் நடத்திய நபர்கள் ஓடி மறைந்துள்ளனர்.

பின்னர், மறுபடியும் அங்கு வந்து ஜாயை அடித்துள்ளனர். இந்தத் தாக்குதலால், ஜாய்க்கு காயம் ஏற்பட்டது. அவர், சிகிச்சைக்காக மருத்துவமனையில் அனுமதிக்கப்பட்டுள்ளார்.

குறித்த தாக்குதல் சம்பவம் தொடர்பில் பேசிய ஜாய், ‘என்னைத் தாக்கியவர்களில் ஒரு பெண்ணும் இருந்தார். அவர்கள் மெக்டோனல்ட்ஸில் வேலை செய்யும் ஒருவர் மீது கோபமாக இருந்தனர்.

ஆனால், அந்த கோபத்தை என்னிடத்தில் காட்டிவிட்டனர். இதுவரை என்னை தாக்கியவர்கள் மீது எந்தவித நடவடிக்கையையும் அவுஸ்திரேலிய காவல்துறை தரப்பு எடுக்கவில்லை’ என்று கூறினார்.

இதனிடையே இச்சம்பவம் குறித்து கேள்வியுற்ற கேரளாவின் கோட்டயம் எம்.பி ஜோஸ்.கே.மணி கண்டனம் தெரிவித்துள்ளார். மேலும், வெளியுறவு அமைச்சகம் மூலம் இது குறித்து உரிய நடவடிக்கை எடுக்கப்படும் என்றும் அவர் உறுதியளித்துள்ளார்.