கால அவகாசம் வழங்கப்பட்டுள்ளபோதிலும் அரசு உருப்படியாக எதையும் செய்யவில்லை. செய்யக் கூடியவற்றையே அரசு செய்யாமல் இருக்கின்றது என்று ஐ.நா. மனித உரிமைகள் ஆணையாளரின் அலுவலக அதிகாரிகளிடம் எடுத்துரைத்துள்ளோம் என்று தமிழ்த் தேசியக் கூட்டமைப்பின் நாடாளுமன்ற உறுப்பினர் எம்.ஏ.சுமந்தி ரன் தெரிவித்தார்.
ஜெனிவாவுக்கு நேற்றுமுன்தினம் திடீரெனப் பயணமான நாடாளுமன்ற உறுப்பினர் எம்.ஏ.சுமந்திரன், ஐ.நா. மனித உரிமைகள் ஆணையாளரின் அலுவகத்தின் மிக முக்கிய அலுவலர்கள் இருவரைச் சந்தித்துக் கலந்துரையாடினார்.
எதிர்வரும் 26ஆம் திகதி ஆரம்பமாகவுள்ள கூட்டத் தொடரில் இலங்கை தொடர்பான வாய்மூல அறிக்கையை முன்வைப்பதற்காக, ஐ.நா. மனித உரிமைகள் ஆணையாளர் தயாராகி வருகின்றார். அவரது உரையைத் தயாரித்து இறுதி செய்யும் பணியில் ஈடுபட்டுள்ளவர்களுடனேயே நாடாளுமன்ற உறுப்பினர் எம்.ஏ.சுமந்திரன் சந்திப்பு நடத்தியுள்ளார்.
இந்தச் சந்திப்பில், இலங்கை அரசு வாக்குறுதி வழங்கியவற்றில் எவை நடைமுறைப்படுத்தப்படவில்லை என்பது தொடர்பில் சுட்டிக்காட்டியுள்ளார். ஆட்சி மாற்றம் ஏற்பட்டு அரசு அமைந்தவுடன் அவர்களுக்கு கால அவகாசம் வழங்கவேண்டும் என்று பன்னாட்டுச் சமூகம் கூறியிருந்தது.
அரசுக்கு வழங்கப்பட்ட கால அவகாசத்திலும் எதுவும் நடக்கவில்லை. உருப்படியாக எதையும் அரசு செய்யவில்லை. செய்யக் கூடிய விடயங்களைக்கூட அரசு செய்யாமல் இருந்திருக்கின்றது என்று நாடாளுமன்ற உறுப்பினர் சுட்டிக்காட்டியுள்ளார்.
